مشق شب

زیتون قانا دؤندو٬ قانی انجیره چکیلدی

یارپاقلاری سولدو سورا زنجیره چکیلدی

شش گوشه لی اولدوز اوخ اولوب جومدو غفیلدن

بیچدی علی اصغرلری٬گول تیره چکیلدی

مست ائیله دی قان عطری وئرن نفت شیوخی

هوپ توتدو دولار یولچوسو تخدیره چکیلدی

"هیهات من الذله" دئیه ن او  یالین اللر

ائتدی غلبه٬گؤز داغی شمشیره چکیلدی

غزه اوجامان داغ کیمی توفاندا دایاندی

اسطوره سی تاریخده تصویره چکیلدی

من عشق آتشيله كؤنول داغلاديم

مقدس سئوگی يه  اوره ك باغلاديم

هرآن لپه لنديم  هرآن چاغلاديم!

آنجاق سن منيم تك چاغلاما جیران!

گونش تك روحوما نورونو ساچدين،

اليمدن ياپيشدين دنيزه قاچدين…

سئوگي قاپي سيني طاق با طاق آچدين!

ايندي ده اوزومه باغلاما جیران!

سئوگي ميز پارلايیر بير چيراق كيمي،

جوشوروق داشيريق بير بولاق كيمي…

محبت بئشيك دير بيز اوشاق كيمي…

لاي لاي چال كؤنلومو داغلاما جیران!

شلاله شلاله گؤزومون ياشي…

آخير گؤزلريمدن ییخیر داغ داشي،

خاطيره لر اولوب يولوم يولداشي

گئديرم آردیمجا  آغلاما جیران!

…