ياغيش معناسي ني قانميش بولودلار چوخ يوبانميش لار.
ده نيزده ن يوخسا قالخمیش لار،اوفوقده دالدالانمیش لار؟
چمن،چول،گول،چايير ،اورمان،ياماج يانمیشسا يا نغين دان،
گئنه ده آلدانيش رنگينده ايليغيم تك بويانميش لار!
كؤنول لرا يچره حسرت لر آلوولو اود قوپارميش دير،
ماراقلی دویغولار آنجاق عطشده دامغالانميش لار!
باخيش يورقون، فيكير دوتقون، سئويم سولقون، گولوش پوزقون!
اوره ك لر بوسبوتون ظلمت ایچینده چپيچالانميش لار!
سرين یئل لر شوران ليقدا،شيرين ديل لر يالان ليقدا،
سوساركن نفرتين تاپداغی آلتدا تاپدالانميش لار.
باشی قوینوندا سولموش گول دوشوب بولبول کناریندا
محبت لر او زولموشكن صداقت لر تالانميش لار!
باخيش لار يول چكير حسرتلی گوزلر يولدا دير سانكی
ياغيش لار ياغماسين بارلی بولودلاردان اينانميشلار!!
مردا د ۶۹ اردبیل
+ نوشته شده در شنبه بیست و هفتم خرداد 1385ساعت توسط نیما
عشقين زيروسینده گزديم آختارديم
گونش سئودالي بير مارال دالينجا
من گئتديم،اوگئتدي،گؤزومدن ايتدي...
سئوال ايدي بیتدی سئوال دالينجا
نه قده ر اوجالديم ماوی گؤيلره
او دوگونلو سيرري بيله بيلمه ديم
توتولدوم غملي بير تبسم كيمي
آغلايا بيلمه ديم گوله بيلمه ديم
قارا بولود كيمي اوره گيم دولدو
دویغومون ياغيشي سيخيليب قالدی
بوغولموش دويغومون هر آدديمیندا،
هارای لی بير داملا ييخيلب قالدی
ايندی٬ توفان ازميش بير لؤتكه كيمي
اليم ساحيل لردن اوزولمكده دير
دولموشام بولود تك يورغون گؤزومدن
معنالي داملالار سوزو لمكده دير
قفسدن يورولموش يالقيز قوش كيمي
ماوي سمالره اوچماق ایستره م
اولو يوكسه ليشين صونسوزلوغوندا
گونش بولاغيندان ايچمه ك ایستره م
+ نوشته شده در شنبه سیزدهم خرداد 1385ساعت توسط نیما
