مشق شب

عشقين زيروسینده گزديم آختارديم

گونش سئودالي بير مارال دالينجا

من گئتديم،اوگئتدي،گؤزومدن ايتدي...

سئوال ايدي بیتدی سئوال دالينجا

نه قده ر اوجالديم  ماوی گؤيلره

او  دوگونلو سيرري بيله بيلمه ديم

توتولدوم غملي بير تبسم كيمي

آغلايا بيلمه ديم  گوله بيلمه ديم

قارا بولود  كيمي اوره گيم دولدو

دویغومون ياغيشي سيخيليب قالدی

بوغولموش دويغومون هر آدديمیندا،

هارای لی  بير داملا ييخيلب قالدی    

ايندی٬ توفان ازميش بير لؤتكه كيمي

اليم ساحيل لردن اوزولمكده دير

دولموشام بولود تك يورغون گؤزومدن

معنالي داملالار سوزو لمكده دير

قفسدن يورولموش يالقيز قوش كيمي

ماوي سمالره اوچماق ایستره م

اولو  يوكسه ليشين  صونسوزلوغوندا

گونش بولاغيندان ايچمه ك ایستره م

آی ظالیمین قیزی! داها یاندیرما قلبیمی

جیران باخیشلی! باخما دایاندیرما قلبیمی

قارتال قانادلی گؤزلری جومدورما اوستومه

سوزدورمه بسدی چوخ هاوالاندیرما قلبیمی

عشقین جانیمدا چیپجالاناندا الین اسیر

گؤزله داغیلیدی ایندی! جالاندیرما قلبیمی

هر بیر سسین گلنده ٬گلیر قلبیم آغزیما

گؤردون قیزارمیشام دای اوتاندیرما قلبیمی

سنسیز لیگیم چتین  دی یا بو سنله ن  اولماغیم؟

بیلسه ن ده ساخلا سیررينی قاندیرما قلبیمی!

بوندان دا چوخ سئوینجه منیم یوخدو طاقتیم

اینجیت بیرآزدا قو ی گئت اوساندیرما قلبیمی!!

هر بیر غزل سنه یازیرام آز قالیر اؤله م

چیرپینتی دان دوشنده یوباندیرما قلبیمی

دریاده یوخ ، من آکواریم لار دا اوزموشم!

عشقین درینلیگینده دولاندیرما قلبیمی.

من کی آلیشمیشام کول اولارکن قوتارمیشام

آی ظالیمین قیزی داها یاندیرما قلبیمی...